ИЦС Груп овластен партнер на DAIKIN за Македонија се приклучува на одбележувањето на денот за правење добри дела „Pay it Forward“, кој во организација на „Инер вил клуб Скопје Еуропеа“ и „Аутизам МК“ ќе се одржи на 14 април (недела) на Школка во Градскиот парк од 10:30 до 14:00 часот.

Преку настанот се одбележува месецот април, кој е посветен на зголемување на свеста за аутизмот преку правење добри дела или попознато како „Pay it forward“.

„На настанот ќе ги славиме хуманоста, човечноста, како и почитувањето и прифаќањето на различностите. Тој ден ќе ја славиме љубовта, ќе ја шириме добрината, љубезноста и позитивната енергија“, истакнуваат организаторите во агендата за настанот, која може да се погледне на следниот линк.

Целта на светското движење „Pay it Forward“ е да се поттикнат повеќе од 10 милиони чинови на добрина во светски рамки. „Pay It Forward“ функционира на начин што поттикнува да се направат неколку добри дела за различни луѓе и од нив да не барате ништо за возврат. Сè зависи од добрата волја на луѓето и нивната желба за хуманост и љубезност.